MASHINDANO ya Zuberi Cup yanatarajiwa kuingia hatua ya robo fainali kuanzia kesho Jumanne Agosti 11, mwaka huu, katika viwanja vya Railway Njoro, huku timu nane zilizofanikiwa kufuzu hatua hiyo zikitarajiwa kuanza kutimua vumbi katika kusaka nafasi ya kusonga mbele.
Katika mchezo unaotarajiwa kuamsha hisia za mashabiki wa soka, Kilimanjaro Wonders FC itakutana na Green Eagle FC, katika pambano linalotarajiwa kuwa na ushindani mkubwa kutokana na ubora wa timu hizo na umuhimu wa mchezo huo.
Akizungumza na waandishi wa habari, Mwenyekiti wa Mashindano ya Zuberi Cup, Japhet Mpande, amesema baada ya kukamilika kwa hatua ya 16 bora, mashindano hayo sasa yanaingia katika hatua ya robo fainali, ambapo kila timu itakuwa ikipambana kuhakikisha inapata nafasi ya kufuzu hatua inayofuata.
Mpande amesema timu zilizofanikiwa kufuzu hatua ya robo fainali ni Kilimanjaro Plantation FC, Green Eagle FC, Kibo Warriors FC, Mandela Rangers FC, Kilimanjaro Wonders FC, Lafamilia FC, Hai United pamoja na Fire FC.
Amesema hatua hiyo inatarajiwa kuwa na ushindani mkubwa, kwani kila timu imefika katika hatua hiyo ikiwa na dhamira ya kupigania nafasi ya kutinga nusu fainali.
Mchezo kati ya Kilimanjaro Wonders FC na Green Eagle FC unatarajiwa kuwa kivutio kikubwa kwa mashabiki, huku kila upande ukiingia uwanjani ukiwa na malengo ya kupata ushindi na kusogeza mbele matumaini yake ya kutwaa ubingwa wa Zuberi Cup.
Kwa upande mwingine, mashabiki wa soka katika eneo la Moshi na viunga vyake wanatarajiwa kujitokeza kwa wingi kushuhudia burudani hiyo, huku macho yote yakielekezwa katika uwanja wa Railway Njoro wakati timu hizo mbili zitakapokutana.
 |
