TAASISI ZINAZOCHUKUA MAJI KWENYE VYANZO VYA MAJI ZIMETAKIWA KULIPIA HUDUMA HIYO

MOSHI-KILIMANJARO.

Bodi ya Maji Bonde la Pangani (PBWB) imezitaka taasisi za kisekta zinazochukua maji kutoka vyanzo vya maji kuhakikisha kwamba wanalipia huduma hiyo ili kuboresha usimamizi wa rasilimali za maji

Mkurugenzi wa bodi hiyo, Mhandisi Segule Segule, aliyasema hayo Machi 29,2025, wakati akizungumza na wadau wa maji kwenye kikao cha mapendekezo ya majina ya Wajumbe wa Bodi ya 11 ya Maji Bonde la Pangani, mkutano uliofanyika ukumbi wa mkuu wa mkoa wa Kilimanjaro.

Katika mkutano huo, Mhandisi Segule alisisitiza umuhimu wa taasisi za kisekta zinazochukua maji kutoka vyanzo vya maji kuhakikisha wanalipia huduma ya maji, kama sehemu ya juhudi za kuboresha usimamizi wa rasilimali za maji na kuhamasisha uwajibikaji katika matumizi ya maji.

Aliweka wazi kuwa hatua hiyo ni muhimu kwa ustawi wa mikoa inayozungukwa na vyanzo vya maji, kwani itasaidia kudumisha usawa katika matumizi ya rasilimali hiyo adimu na kuhakikisha kuwa huduma za maji zinapatikana kwa wote.

Alisema kuwa uharibifu wa mazingira kwenye vyanzo vya maji kwa kawaida una viashiria vingi na kwamba vyanzo vya maji vilivyo karibu na maeneo ya miji vinakuwa kwenye hatari kubwa zaidi, huku akisema kuwa shughuli za binadamu, kama vile kilimo, uchimbaji wa mchanga, ujenzi na uchafuzi wa mazingira, ni miongoni mwa mambo yanayoathiri vyanzo vya maji na kusababisha upungufu wa maji safi na salama.

“Vyanzo vya maji vilivyo karibu na miji vinapozidi kuchafuliwa na kuharibiwa, ni vigumu kudumisha ubora wa maji na viwango vya usafi vinavyohitajika kwa matumizi ya binadamu, kilimo, na viwanda na kuwataka wadau wote wa maji kuchukua hatua za pamoja katika kulinda vyanzo vya maji na kuhakikisha kuwa mazingira yanatunzwa kwa manufaa ya jamii nzima”.alisema.

Alisema kuwa PBWB imejiwekea mikakati madhubuti ya kuhakikisha inatembelea maeneo yote yenye vyanzo vya maji vilivyoko mijini, kwa lengo la kuweka alama za kuzuia maendelezo mapya ya makazi ndani ya mita 60 kutoka kwa vyanzo vya maji.

“Mikakati hii inalenga kudhibiti ujenzi holela na matumizi yasiyofaa katika maeneo muhimu ya vyanzo vya maji, ili kuhakikisha kuwa rasilimali hizi zinatunzwa kwa manufaa ya vizazi vijavyo,”alisema Mhandisi Segule.

Alisema kuwa watu wengi wanaoishi karibu na vyanzo vya maji, hasa katika maeneo ya mijini, mara nyingi huathiri mazingira kwa ujenzi na shughuli nyingine zinazoharibu vyanzo vya maji, kwa kuweka alama na kudhibiti ujenzi ndani ya umbali huo wa mita 60, Bodi ya Maji Bonde la Pangani inatarajia kulinda vyanzo vya maji na kuboresha ubora wa maji kwa matumizi ya jamii nzima.

Akifungua kikao hicho kwa niaba ya Katibu Tawala wa Mkoa wa Kilimanjaro Kiseo Nzowa, Mhandisi Jackson Masaka kutoka sekretarieti ya Mkoa wa Kilimanjaro, aliwataka wale watakaochaguliwa kuiongoza Bodi ya Maji Bonde la Pangani, kuzingatia weledi na uadilifu wakati wa kutekeleza majukumu yao.

“Wajunbe watapakapokabidhiwa wajibu wa kuiongoza bodi hii, wahakikishe wanatekeleza wajibu wao kwa kuzingatia sheria ya usimamizi wa raslimali za maji namba 11 ya mwaka wa 2009,”alisema Mhandisi Masaka.

Katika kikao hicho Mhandisi Masaka aliupongeza uongozi wa Bodi ya Maji Pangani, kwa kufanya shughuli zake kwa kutumia dhana ya ushirikishi jambo ambalo alisema linachangia kuweko kwa amani miongoni mwa watumia maji.

Akizungumza kwa niaba ya Mkurugenzi wa Idara ya Uendelezaji wa Rasilimali za Maji, Wizara ya Maji Modestus Zacharia, alisema kuwa rasilimali za maji zinazidi kupungua kutokana na uwepo wa shughuli za binadamu kwenye vyanzo vya maji.