USHIRIKA-MOSHI
Naibu Waziri Mkuu na Waziri wa Nishati
Dk. Dotto Biteko, ametoa rai
kwa wadau wa Maendeleo kushirikiana na Wandaajiwa Mbio za Kilimanjaro
International Marathon ili kutumia mashindano hayo kuinua sekta ya utalii hapa nchini.
Dk. Biteko aliyasema hayo Februari 23,2025 mjini Moshi, wakati akihitimisha
mbio hizo ambazo zimeingia msimu wa 23 tangua kuanzishwa kwake mwaka 2002.
Alisema taarifa zinaonesha kuwa ushiriki katika mashindano hayo
unaongezeka kila mwaka; huku akitolea mfano mwaka 2024 ambapo jumla ya
washiriki walioshiriki mbio hizo walikuwa 12, 800 na mwaka huu idadi hiyo
imefikia zaidi ya 20,000.
Dk. Biteko aliwataka wananchi kuendelea kushiriki mazoezi mara
kwa mara ili kuboresha afya zao na pia kuepuka maradhi yasiyoambukiza ambayo
yamekuwa ni tishio ndani ya jamii katika miaka ya hivi karibuni.
Aidha aliwapongeza wadhamini wa mashindano hayo wakiwemo
wafadhili wakuu Kilimanjaro Premium Lager na wadhamini wa mbio za kilomita 21
kampuni ya Yas Tanzania kwa kufanya mashindano hayo kuwa na mafanikio makubwa
kwa kipindi chote cha miaka zaidi ya 20.
Kwa upande wake Waziri wa Habari, Utamaduni, Sanaa na Michezo
Profesa Palamagamba Kabudi alisema mashindano ya Kilimanjaro Marathon yamepiga
hatua kubwa katika kukuza michezo hapa nchini.
“Waziri wa Habari, Utamaduni, Sanaa na Michezo ipo tayari
kushirikiana na Wizara ya Maliasili na Utalii pamoja na waandaji wa
Kilimanjaro International Marathon katika kutangaza utalii kutokana na Nchi ya
Tanzania kuwa na vivutio vingi vya utalii.”alisema.
Aidha Waziri Kabudi alielekeza Baraza la Michezo Tanzania
(BMT), kushirikiana na Shirikisho la Riadha Tanzania (RT) kuandaa mpango
mkakati wa kuendelea vipaji vya mchezo wa riadha ili kuweza kupata vijana wengi
zaidi watakao kuwa wakishiriki mbio hizo kwenye mashindano mbalimbali ya
kitaifa na kimataifa.
Waziri Kabudi alisema katika kutimiza azma hiyo Serikali
inajenga viwanja vya kisasa vya mpira wa miguu Jijini Arusha na Dodoma ambapo
vitakuwa na miundombinu ya mchezo wa riadha na kwamba viwanja hivyo vitakuwa na
viwango vya FIFA na Olmpic ili kuwapa fursa wanariadha wa Kitanzania kujinoa
kwa kufanya mazoezi ya kutosha ili waweze kushindana Kimataifa.
Awali akizungumza Rais wa Shirikisho la Riadha Tanzania Silas
Isangi,alisema kuanzia mwaka 2020 hadi 2025 mbio za nyika zimeendelea
kufanya vizuri hapa nchini tofautia na kipindi cha nyuma.
Akitangaza matokeo ya washindi wa mbio
hizo Kocha wa Timu ya Taifa ya Riadha Anthony Mwingereza,alisema Wanariadha wa
Kitanzania wamenga’ra katika mbio za Kimataifa za Kilimanjaro mwaka huu, ambapo
Hamis Misai alishinda nafasi ya kwanza mbio za kilomita 42.2 kwa muda wa saa
2:20:45.
Alisema kwa nafasi ya pili ilichukuliwa na Aloyce
Simbu wa Tanzania aliekimibia kwa muda wa saa 2:21:17, mbele ya Mkenya Abraham
Kipkosgei wa Kenya aliekimbia kwa muda wa saa 2:24:12.
Aidha alisema kwa upande wa Wanawake nafasi ya kwanza
ilichukuliwa na Jacinta Chepkoech wa Kenya aliekimbia kwa muda wa saa 2:45:39,
akifuatiwa na Agnes Musabyimana kutoka Rwanda aliekimbia kwa muda wa saa
3:00:07 na nafasi ya tatu ilichukuliwa na Neema Sanka wa Tanzania aliekimbia
kwa muda wa saa 3:00:49.
Alisema kwa upande wa mbio za kilomita 21.1 za Yas Kilimanjaro Marathon half-marathon, mshindi alikuwa ni Mtanzania Failuna Matanga aliekimbia kwa saa 1:17:37 na kumtangulia Irine Wawuda wa Kenya aliekimbia kwa muda wa saa 1:18:44 mbele ya Mtanzania Neema Festo aliekimbia kwa muda wa saa 1:21:38.
.jpg)
