MOSHI-KILIMANJARO.
Wafanyabiashara na Wajasiriamali
mkoani Kilimanjaro, wameasawa kutumia vyema wigo wa biashara ya huduma ya duka
mtandao (Posta Online Shop) ili kuuza na utangaza bidhaa zao katika masoko ya
ndani na nje ya nchi ili kukuza biashara zao.
Hayo yamesemwa mnamo Oktoba 9,2024 na
Afisa Posta Masta
Mkoa wa Kilimanjaro Charles Stephen, wakati akizungumza na Wafanyabiashara wa
soko la Mbuyuni, lililopo katika Manispaa ya Moshi, ikiwa ni Maadhimisho ya
Siku ya Posta Duniani, ambapo waliisherehekea kwa kuwatembelea wafanyabiashara
hao na kuwaeleza umuhimu wa matumizi ya sanduku la Posta.
Akizungumzia huduma hiyo mpya, Afisa Posta Masta huyo
amesema Shirika la Posta, limeanzisha huduma hiyo ili kuwasaidia
wafanyabiashara na wajasiriamali kufanya biashara zao kwa njia ya mtandao.
Stephen, amesema mteja atakapojisajili kwa njia ya mtandao, ataweka bidhaa zake na maelezo kama bei, uzito na akishamaliza mteja huyo pia ataweza kuona bidhaa hizo kupitia duka mtandao (Posta Online shop).
"Kupitia huduma ya duka mtandao
(Posta Online Shop)
mteja anaweza akanunua bidhaa kupitia huduma za kifedha za Tigo Pesa, M-Pesa,
Airtel Money au kwa Credit Card na Shirika la Posta litaenda kuchukua hiyo
bidhaa kwa muuzaji na kuipeleka kwa mteja moja kwa moja iwe ndani au nje ya
nchi," amesema Stephen.
Aidha amesema mfanyabiashara au
Mjasiriamali akijisajili kwenye huduma hiyo, atapata fursa ya kutangaza bidhaa
zake kwenye wanachama 180 na kupitia Shirika la Posta, mteja anaweza akanunua
bidhaa tofauti kwa wakati mmoja na akishalipia papo hapo alipo Posta itampelekea
hadi nyumbani.
Katika hatua nyingine Postamasta huyo, ameupongeza
Umoja wa Posta Afrika (PAPU) kwa kuendelea kuunga mkono juhuzi za Serikali
kwenye Sekta ya Posta Barani Afrika hususan katika huduma za Kimtandao lengo
likiwa ni kurahsisha huduma za Posta kwa wananchi.
.jpg)
